Proxecto Inclusivo

O Proxecto Inclusivo do centro responde á necesidade de favorecer o acceso ás ensinanzas regradas de música a todo tipo de alumnado. Este proxecto de innovación educativa foi autorizado pola Consellería de Educación e Ordenación Universitaria da Xunta de Galicia en 2011 e está regulado na Orde do 25 de outubro de 2022:

https://www.xunta.gal/dog/Publicados/2022/20221109/AnuncioG0655-311022-0001_gl.html

DESTINATARIOS

Este proxecto vai dirixido ao alumnado con necesidades educativas especiais, escolarizado en centros ordinarios ou de educación especial, que se considere apto para seguir as ensinanzas musicais de grao elemental. O alumnado deberá ter a autonomía suficiente para desenvolverse no centro sen precisar asistencia individual de persoal docente e/ou non docente.

REQUISITOS

Será indispensable que os/as aspirantes superen unha proba específia de acceso na que se avaliarán as aptitudes musicais. Os requisitos para poder participar nas probas de acceso son:

• Ter entre 8 e 18 anos.
• Realizar a preinscripción da proba nas datas determinadas polo centro.
• Achegar na preinscripción a documentación que avale as condicións de discapacidade do alumnado. Esta documentación incluirá un informe do departamento de orientación do centro educativo no que está escolarizado o alumno/alumna (ver anexo 1 da Orde do 25 de outubro de 2022)
• Achegar autorización asinada polos pais/nais/titores/titoras legais do alumnado para o traslado de información referente aos aspectos psicopedagóxicos do alumnado entre a xefatura de departamento de orientación do centro educativo de réxime xeral e a coordinación do Proxecto Inclusivo (ver anexo 2 da Orde do 25 de outubro de 2022).

RESERVA DE PRAZAS

O número de prazas non será menor ao 3% do total das prazas ofertadas polo centro.

PROBAS DE ACCESO

A proba de acceso adaptarase ás circunstancias persoais en cada alumno/a e avaliarán a aptitude rítmica, auditiva, vocal e psicomotriz dos/das aspirantes.

As especialidades instrumentais ofertadas serán asignadas polo tribunal avaliador en función das preferencias dos/das aspirantes e da valoración do tribunal sobre a adecuación das capacidades e necesidades específicas de cada aspirante.

ORGANIZACIÓN ACADÉMICA

O proxecto encádrase no Decreto 198/2007, do 27 de setembro, polo que se establece a ordenación do grao elemental  das ensinanzas de réxime especial de música, e rexese pola normativa vixente en referencia ás ditas ensinanzas. A organización académica será a seguinte:

• 1 sesión semanal de clase individual de instrumento
• 2 sesións semanais da materia de Linguaxe Musical
• 1 sesión semanal de Educación Auditiva e Vocal
• Poderán dispoñer dunha hora de clase colectiva co resto de alumnado matriculado na especialidade sempre que a dispoñibilidade do profesorado, espazos e tempos do centro o permita.

A duración das sesións será a que o equipo de profesorado determine en función das competencias curriculares de cada alumno/a.

MATRÍCULA

O alumnado cunha discapacidade superior ao 33%  terá matrícula gratuita.

COORDINADORA

Arantxa Vera Beltrán.